特首喺《施政報告》提到要喺十八區推廣《基本法》，當局早前就決定向各區撥款二十五萬元，舉辦《基本法》宣傳活動。據聞十八區區議會近月已開始密鑼緊鼓咁做籌備工作，但限期竟然係今年五月初，即係各區要喺餘下時間唔多，用晒呢二十五萬元兼搞埋活動，但又冇規定要做啲乜嘢喎。唔知係咪呢個原因，唔少區議會都要急就章，唔理好醜但求快手完事，真係得啖笑。

設計圖片及對白

我哋向各區議會查詢所得，大部分區議會都係將呢個推廣《基本法》嘅責任交畀轄下委員會，例如公民教育委員會，又或交畀財務委員會進行，唯獨葵青區議會特別成立咗個工作小組，認真夠重視。咁小組主席係邊個呢？竟然係白鴿黨嘅議員林立志，一個咁重要嘅位置，點解建制派會拱手讓畀泛民主派呢？唔通又係和諧？

嚴密監察 防出差錯

話說日前選小組主席時，因為區議會主席方平有公務出差，而其他建制派議員就因為請假同冇授權畀助理投票，林立志就喺呢個時候突擊舉手自薦，最後建制派以一票之差，輸咗個小組主席畀白鴿黨，認真失策。好似話建制派依家擔心緊白鴿黨會唔會因林立志做咗小組主席，下令喺區內大搞佔領中環行動推廣。

嘩！咁仲得了，隨即有傳聞話班建制派議員知驚，呼籲所有建制派議員加入小組，相信身兼工聯會嘅立法會議員麥美娟都會加入，藉以監察林立志一舉一動，慎防有任何差錯。

第一手消息請下載on.cc東網iPhone/iPad/Android/Windows Phone Apps