「市民住籠屋，特首曾大屋」、「反貪污、捉煲呔」、「曾商勾結，窮奢極恥」……呢啲示威標語一針見血，今日重溫，係咪依然歷歷在目呢？冇錯嘞，今日係前特首曾蔭權爵士貪腐醜聞曝光兩周年，呢個「香江第一貪」至今依然逍遙法外，市民嘅感覺係既憤怒又無奈！

憤怒，皆因貪曾無恥。兩年前嘅今日，東方報業集團獨家踢爆貪曾夫婦現身澳門江湖飯局，乘坐城中富豪遊艇吃喝玩樂三日兩夜，消息震驚全港，為貪曾連串貪腐醜聞揭開序幕，「深圳禮賓府」、「富豪飛機團」、「貪遍省港澳、歎盡海陸空」，沒有最醜，只有更醜，市民唔睇到眼火爆就假。至於無奈咯喎，咪就係因為廉政公署無料到囉，查貪曾查咗兩年仲係如泥牛入海，無影無蹤，市民唔失望就有鬼啦。

嗱，廉署查貪曾拖拖拉拉，真係令人忍無可忍o架。正如律政司前刑事檢控專員江樂士話齋，貪曾案情直截了當，廉署居然查咗兩年都未完成，簡直令人難以置信，佢寄語廉署從速為貪曾案埋尾，以顯示並非港府傀儡，以及公正處理前廉政專員湯顯明貪腐案嘅決心。有舉報人亦批評，兩年係一段好長嘅時間，但係至今未收過廉署有關調查進度嘅通知，將會去信廉署要求交代。

冇錯嘞，兩年流流長，查乜都應該有結果喇。廉署喺貪湯年代就話官官相衞，包庇貪曾啫，家陣貪湯自己都淪為過街老鼠，身敗名裂喇，廉署仲唔撥亂反正，捉貪懲奸，唔通真係想金漆招牌不保咩？港府高官都承認，貪湯事件動搖市民對廉署嘅信心，對此感到惋惜及痛心喎。計太一叮話齋，貪曾嘅貪腐罪行比貪湯嚴重百倍都唔止，如果貪湯嘅貪腐醜聞動搖市民對廉署嘅信心，咁貪曾逍遙法外必定更加動搖市民對成個政府嘅信心。

講到呢度，大家係咪覺得奇怪，堂堂廉署居然對「絕代雙貪」束手無策，究竟係力有不逮，定係放軟手腳吖？內地今時今日都要鐵腕反腐，又打老虎又打蒼蠅，連前政治局常委周永康據講都被關入鐵籠喇，香港嘅反貪決心仲唔及內地，法治及廉潔基石想唔被摧毀都幾難喇！

等太一叮同大家重溫多一張示威標語：「專員無恥，廉政必亡！」現任廉政專員白韞六如果唔想好似貪湯咁成為人民公敵，如果唔想香港嘅廉潔及法治招牌不保，唔該快快抬出狗頭鍘，唔好畀絕代雙貪逍遙法外吖，叮！

第一手消息請下載on.cc東網iPhone/iPad/Android/Windows Phone Apps