香港特區的管治，自從跌入一班廢柴庸官手裏之後，政治民生上，不特止一日衰過一日，創意和各種自由亦一天比一天萎縮。

嗱！唔使舉證，唔使實牙實齒羅列證物擺在枱頭，全港七百萬人都感受到今天的「方方面面」確比十六年前的差，又或，甚至比十六個月前衰！

好！若要真憑實據吖嘛！睇吓湯顯明、吳克儉、周一嶽和曾蔭權呢幾條友吧！還有每逢出嚟見人講嘢，一定會說「按機制程序上，我會……」咁嘅廢話的「人肉錄音機」卡片蘇，恍如機器人般冷冰冰地讀稿了事。

就係因為乜都「按機制程序」辦事，永不孭鑊的官僚思維，由上而下推出，令成個社會hea得自我約制，甚至出現「白色恐怖」的反常。

嗱！為免又被人話無證無據的胡亂猜度，就用卡片蘇「管轄」的香港電台做例吧！最近，香港電台設立自己的電視頻道，星期一至五，每日播八個半小時電視節目（星期六、日則播十三個半鐘頭），因財政資源嚴重缺乏，於是將以前經典的《獅子山下》重新包裝，逐集推出，本來是一大德政，讓全世界睇番七十年代香港的實況，可惜，源自「機制程序上」的失常，前日播出那集，講一個青年看的那本「黃色雜誌」，居然「打格仔」喎！喂！四十年前的開放，去咗邊？唔通今日會保守過嗰陣時？仲有，當年嘅電視檢查制度一定嚴過依家啦！而且，香港電台攝製，入得家庭的，會有幾「色情」吖？咁都要「打格仔」，都幾官僚囉！

當一個社會的「進步」過程，仲衰過四十年前，而衰敗的原因，係廢柴高官的劣政所致，這處的人們不要說乜乜自由了！唔活於事事憂心的白色恐怖下，已算幸福！你話可唔可憐吖！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps