「少膽虫，你同我入嚟！」一返工就畀淫賤黎召入房，真係乜嘢心情都冇晒，但為咗份工，少膽虫都惟有擺出和藹笑容入去見腦細︰「唔知腦細有乜吩咐呢？」

淫賤黎一見少膽虫就拍枱問︰「點解得幾個人返工？啲人去晒邊度？」「腦細你話要節流吖嘛，啲人工高少少嘅上個月畀你炒晒啦！」少膽虫真係唔知佢扮失憶定真健忘。「我夠知喇，死蠢！」淫賤黎嗌到鬼殺咁嘈︰「我係問你做乜唔請新人呀？」少膽虫即時呼冤︰「我有做嘢o架，不過啲人一聽到幾錢人工就掉頭走咋！」鬼咩，得嗰一萬蚊唔夠仲要加班受氣，啲大學生寧願去洗碗好過做《爛果》喇！

「我唔理！」淫賤黎篤住少膽虫個頭話︰「你係腦腫，你同我諗掂佢！」少膽虫急中生智︰「有計！長策會話要收緊公屋政策，趕絕啲無殼80後，我哋只要將office間做劏房當員工宿舍，到時實大把後生仔嚟見工喇！」就係咁，少膽虫又大步檻過。

第一手消息請下載on.cc東網iPhone/iPad/Android/Windows Phone Apps