城中鏡：雷賢達太太搓麵粉圓夢

話說麵粉花手工藝曾經喺香港好盛行，雷太講笑咁話細個冇心機讀書，用好多時間去畫畫，結咗婚之後就冇做護士，一直全職做家庭主婦相夫教子，擺低咗少女時代嘅藝術夢，到咗七年前姪女由外國返香港度假，雷太喺安排節目時諗起不如一齊用麵粉花做手工藝，搓吓搓吓就搵番對藝術嗰份執着同追求出嚟，仲靠一對巧手搓晒成場麵粉藝術作品展覽嘅展品出嚟。

作品展以「十二生肖賀新春 百子同歡慶新禧」為主題，除有大大盆以唔同生肖為題嘅藝術品外，仲有一盆特別描繪出「百子」慶祝新年嘅盛況，每個人嘅面部表情都栩栩如生。雷太話好享受製作過程，仲學識咗追求完美時要「捨得」，好似做花時如果仿真度有偏差就要放棄，雖然心痛都要從頭嚟過，但最開心嘅都係可以公諸同好。佢話自己啲「手作仔」size大，擺喺屋企用咗唔少位，好好彩有雷生容忍同支持。