城中鏡：金價跌商家好淡爭持
舊年金價累計勁跌約三成，係三十年嚟最大跌幅；雖然農曆新年後國際金價小回春，但仍處於低位。做珠寶金飾生意嘅中西區區議會前主席胡楚南直言睇唔通透後市，太子珠寶鐘錶主席鄧鉅明就打算到內地開金舖，算係審慎樂觀嘅穩陣派。金銀業貿易場理事長Haywood張德熙則繼續做激進嘅黃金大好友，力撐黃金仍係最佳避險工具。
冷靜派
胡楚南（右）同新抱王凱曼（左）冷靜面對金價起落。
樂觀派
張德熙仍睇好金價後市。
穩陣派
鄧鉅明（左）同太太鄧宣宏雁（右）決定到內地開金舖。
胡楚南話舊年嘅金價走勢好難捉摸，幸好透過對沖同減少存貨等風險管理，公司最終都錄得理想業績。負責幫佢打理生意嘅新抱王凱曼就話，舊年金價波動之大係佢入行多年前所未見，以往只需參考美元匯價即可判斷金價走勢，但係近年量化寬鬆政策同地緣政治亦係左右金價因素，以致過去分析金價嘅方法未必管用，增加經營難度。好彩佢哋兼營鑽石，分散經營風險。
開金舖比珠寶行成本低
舊年「中國大媽」搶金實力震驚華爾街，鄧鉅明亦睇好內地飾金市場，準備將旗下鎮金店帶入內地二、三線城市。負責開拓內地市場嘅鄧太宣宏雁話，相比起開珠寶鐘錶行，金舖開店成本低好多，而且金飾勝在單價低，幾百蚊就有交易，正好符合內地吹起嘅節約風。
一向睇好黃金前景嘅Haywood就話，呢一波跌市係受到美國逐步減買國債影響，一旦美國全面退市，消除呢個不明朗因素後，相信金價可重拾升勢。佢透露，好多大型基金同投資機構嘅投資組合中，黃金仍然佔兩至三成，因此黃金仍可睇高一線，預計今年第二季可升至每安士一千二百美元至一千四百美元之間。
不過，以上純屬名人嘅個人意見，係咪投資黃金，要大家自行評估風險。
