政壇：搞搞政：陳家洛搶咪騎劫建仔示威
話說立法會議員鍾樹根尋日喺立法會提出口頭質詢，針對筲箕灣愛德街同愛勤道交界用地起插針式私樓，或會影響鄰近地區嘅通風同採光，而佢嘅建仔黨友、東區區議員顏尊廉就同二十幾個東區街坊，拎住印有黨徽嘅示威牌到政府總部外請願，話反對政府喺筲箕灣起屏風樓，要求當局擱置計劃。
設計圖片及對白
被轟「有奶便是娘」
樹根到場接信，點知喺佢離場時，緊隨其後竟然見到公文袋議員陳家洛到場。陳家洛仲攞住建仔嘅大聲公，企正喺前面叫咪，唔知仲以為佢轉咗黨。佢呢個舉動，據聞引起部分建仔支持者不滿，有人鬧佢「抽水」，有啲人話佢「博出位」，有啲更批評佢「有奶便是娘」添！
陳家洛回應話，唔覺得自己嘅出現有乜嘢問題，因為佢都有跟進呢件事，況且唔少到場示威嘅居民都係佢擁躉，佢依家同建仔嘅意見又一致，所以佢只係支援吓班街坊啫。佢仲話過去六年都喺唔同地方反對劣質規劃，所以建仔今次反對政府賣地，其實係支持緊佢嘅立場喎。不過，最奇係陳家洛點解可以攞到建仔個咪喺度講嘢，佢就話係顏尊廉交個咪畀佢講嘢喎。如果真係咁送上門被騎劫請願，建仔區議員嘅和諧同包容性就認真大嘞。
