中銀保誠信託行政總裁陳禹昌都有參加渣馬，佢話今次天氣得十三至十四度，唔算太凍，但自己狀態唔好，影響成績。佢仲大爆自己早就過咗六十歲，好難再跑出好成績。其實要堅持跑畢全程真係唔易，據聞嗰日「甩底率」幾高，即使成績差咗，佢呢種體育精神絕對可嘉!

陳禹昌話每年跑馬拉松就好似探個老朋友咁。（資料圖片）

即使今次時間慢咗，但佢似乎都相當享受。佢話如果唔係跑馬拉松，人生應該冇乜機會可以行吓青馬大橋喎！佢仲話下年都會再跑，每年一次，好似探個老朋友咁，幾個鐘就搞掂。

有啲人就話年年條賽道都差唔多，冇乜新意，但陳禹昌話其實都好唔錯，年年都有少少改善，加上香港地方咁細，搵條路闊啲容納參賽嘅人都唔容易o架，將就吓啦!

除陳禹昌外，嗰日仲見到康宏主席王利民，佢繼續幫Green Monday推廣素食主義，件運動衫上面有棵立體菜，佢仲呼籲大家咪食翅添。

第一手消息請下載on.cc東網iPhone/iPad/Android/Windows Phone Apps