政壇：卿姐幫記者爭取暖風機
近日天氣忽冷忽熱，一日溫度隨時相差十度，尋日仲跌至最低八度添。立法會尋日開會，記者喺俗稱「冷巷」嘅一樓走廊一邊採訪、一邊打稿，部分人都覺得凍。做過記者嘅立法會議員劉慧卿尋日朝早行經「冷巷」時，就聽到有行家話凍，佢都幾關顧行家，即時向秘書長陳維安「報道」情況同跟進，陳維安亦從善如流，即刻叫同事買咗兩部暖風機，令整條「冷巷」加添咗暖意。
「冷巷」有咗兩部暖風機後即刻冇咁凍。
劉慧卿
陳維安買暖風機之前，求真咁派同事問問各位行家意見，雖然最終都係冇共識，但係佢都決定一錘定音，即時買咗兩部直立陶瓷式暖風機，睇番價錢都要成二千蚊。卿姐之後就讚佢從速行動，話呢筆數會由行政管理委員會支付。
議員辦公室又使唔使用暖風機呢？原來議員辦公室有暖氣提供，但依然有議員話唔夠暖，睇嚟佢哋要買個焗爐至得嘞！
