政壇：黑客冒葉澍堃廣發求救電郵
電郵黑客最近頻頻出手，唔少名人嘅電郵相繼被入侵，尋日就連前高官、香港賽馬會大董Stephen葉澍堃都中招。
設計圖片及對白
話說尋日下晝三點幾鐘，突然好多朋友通知Stephen，話收到佢一封電郵，內容講述佢身在塞浦路斯開會，喺一個巴士站被賊人偷咗個袋，所以身上所有證件、錢同電話等重要物品都全部冇晒，然後話好需要朋友幫助喎！其實呢啲老土呃人橋段，一睇就知假到爆啦，好耐之前就已見過，估唔到最近又重現，亦都係因為呢件事，搞到Stephen尋日前前後後合共收咗成百幾個朋友嘅電話、短訊同電郵問候，真係回覆到手都軟埋，有身兼立法會議員嘅老友仲喺開緊會期間，都打去睇吓佢發生乜嘢事。
因禍得福 心都甜埋
事實上，Stephen嘅屋企人當然知道佢依家身在香港啦，所以唔使打電話去核實都知呢單嘢係流料，邊有咁容易上當吖。而Stephen其他朋友好似議員林健鋒咁，亦話一睇就知個電郵係假嘅，仲即刻將收到嗰封電郵刪除埋添。
之不過，點都要通知吓朋友個電郵畀人入侵咗。佢就話唔使報警，因為佢已即時改番個新嘅密碼，並向朋友解釋清楚，冇絲毫損失之餘，仲反而覺得好安慰添，因為呢件事令佢知道身邊人原來有成百幾個朋友咁關心自己，仲唔即時心都甜埋咩！
第日如果大家見到呢類型呃人電郵，都記得要好似Stephen啲朋友咁，打個電話去問清楚先呀，因為倘若個個朋友都當係流料唔理，當事人真係被盜竊嘅話，咁就叫天不應、叫地不聞嘞！
