蝗蟲走狗大混戰 文明城市不敢當
客似雲來，執番身彩，香港迪士尼樂園尋日公布業績，繼前年之後第二年轉虧為盈，總算擺脫年年虧損嘅夢幻魔咒。當然啦，米老鼠開始年年有餘，最開心嘅係納稅人，講到尾港府係股東之一，大家實在唔希望不停供養呢隻大白象囉。
點解迪士尼樂園可以扭虧為盈呢？因素固然好多，不過最主要係呢樣——內地客源持續增長。你知啦，米老鼠近年食正個人遊支水，遊客絡繹不絕咯喎，財源自然滾滾而來，所以話，內地遊客對推動本港經濟繁榮確係功不可沒o架。
可惜嘅係，一個銀幣有兩面，凡事有利必有弊。內地遊客踏破門檻，商家梗係多多益善喇，不過對一般市民嚟講就未必人人都能夠馬上適應，於是中港矛盾不斷升溫，「蝗蟲」與「走狗」嘅互相指罵時有所聞。呢嗱，日前有團體將呢股反彈情緒演變成激烈行動，居然喺尖沙咀發起「驅蝗行動」，內地遊客興致勃勃掃貨，佢哋就「來勢兇兇」掃場，沿路高叫「大陸蝗蟲打橫行」等挑釁口號，又多次叫途經嘅內地遊客不要來港，期間有內地女遊客因為感到委屈而爆發罵戰，亦有撐個人遊團體因為睇唔過眼而互相辱罵，更加有金舖因為不勝其擾而落閘自保。
唉，過門都係客，何必搞成咁呢？香港人一向重視好客之道，家陣居然發生辱罵遊客事件，傳咗出去乜形象都冇晒喇。正所謂，己身不正，何以正人。如果批評內地遊客不文明，唔通周街謾罵遊客就好文明咩？如果譏笑內地同胞冇禮貌，唔通粗口橫飛大打出手就好有禮貌咩？人必自侮而後人侮之，香港如果變得激進橫蠻，由「好客之都」變成「罵客之都」，最終被玷污嘅唔係內地遊客，而係香港旅遊城市個招牌吖。
其實，辱客趕客何止不文明，直頭不理智。依家全世界都想賺人民幣，出盡法寶吸納內地遊客，香港偏偏有人要將財神爺趕走，你話係咪嫌錢腥吖？大家不妨睇吓，嗰頭加拿大話取消投資移民項目，呢頭希臘即刻話歡迎中國人到當地買樓移民，點解呀，咪就係覬覦中國同胞嘅強勁消費力囉。有財通天下，內地同胞袋裏有錢，想去邊度旅遊消費都得，此地不留人，自有留人處，到時肥水流向別人田，香港市面水盡鵝飛，莫講話迪士尼樂園隨時跌回虧損黑洞，百行百業都可能大嗌救命吖！
一句講晒，趕客等如倒米，「驅蝗」團體呼籲帶備殺蟲水，其實趕客行為就係飲鴆止渴，千祈唔好毒害香港吖，叮！
