SUN搞作：打橫嚟講：中港矛盾深層原因大解密
假假地，香港回歸大陸政權統治都有十六年多啦！兩地人民交往之頻密，看看羅湖邊境水貨走私客的盛況，便知乜嘢叫做「無掩雞籠」矣！
如斯關係良好，何解，今時今日，久不久，就見一班不滿大陸自由行旅客的港人，帶定「殺蟲水」出街示威抗議，直指來港「消費」的內地人為「蝗蟲」，要趕佢哋返鄉下呢？
另一面，那批手提大量人民幣（其中曾被揭發有假鈔）到港享樂的「富豪」，又不高興連講電話大聲啲都唔得，踎喺街邊的自由也沒有，甚至多買兩罐奶粉亦要被充公兼罰款……
兩面不是人的局面，正正是香港廢柴政府束手無策、唔知點算，亦不去處理的一單「獨立事件」。
香港廢柴政府明知港人忍到就嚟爆炸，也不敢攔截大陸水貨客，當然有原因o架啦！嗱！西環頭領上星期便當眾大讚內地人係無私的為香港付出貢獻呀！人家抬錢嚟救你班香港死窮鬼，唔係佢哋，你香港人全部餓死晒矣！這腔調和定性，就是一群大陸芝麻官不斷廢噏令現今內地人信到十足的大道理；佢哋十三億人變晒救世主，出親國門，去到邊度，唔係救濟他人，就係施捨畀窮鬼咯！
講「無私」？喂！一買一賣啫！公平交易咋！唔通成班香港差佬北上東莞係「付出貢獻」？如果大陸班佳麗唔收錢，就「無私奉獻」嘞！
同香港人講「無私」？五、六十年代，香港人窮得自己不食不穿，儲錢買糧油，抬衣物回鄉接濟，呢啲就叫「無私」嘞！
香港廢柴政府一日唔做嘢，中港矛盾一日不安寧！加上一批劣質土豪來港囂張，抵畀人趕嘅！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
