SUN搞作：少膽虫手記：淫賤黎五常法
壹全霉危急存亡，淫賤黎不得不召開特別會議，力圖吊住條命。「壹全霉全體員工要切實執行五常法，幫公司起死回生！」五常法？咪當我唔識嘢，即係常組織、常整頓、常清潔、常規範、常自律吖嘛，如果咁就救到壹全霉，我瞓身執行又點話，真係發夢冇咁早。「大家咪以為我執人口水尾，我淫賤黎嘅五常法絕對與別不同！」淫賤黎認叻嘅同時，向我哋派發五常法備忘，內容如下：
常組織：壹全霉員工要多啲從事組織滲透，簡單嚟講就係慳水慳力，透過盜取新聞減省成本。
常整頓：拒絕放低尊嚴，談甚麼新聞操守，就係同公司作對，必須減薪整頓，以儆效尤。
常清潔：壹全霉唔講社會責任，只向錢看，唔肯放低理想嘅員工，必須清走。
常規範：員工必須將新聞創作規範化，要做到係又作，唔係又作，確立獨有風格。
常自律：要養成良好習慣，自律自主誨淫誨盜，無時無刻加鹽加醋，將淫風送遍四方。
睇完淫賤黎嘅五常法，本虫冷汗直冒。驚，唔係因為五常法太恐怖，而係本虫知道淫賤黎已經短路，壹全霉無藥可救，我腦腫呢份工，唉，冇幾多日咯。
