城中鏡：羅寶文藉寶狄傳播正能量

寶寶？咪就係羅寶文創立嘅品牌「寶狄」囉，佢仲被稱為「寶狄媽媽」添！《寶狄與好友之超原能星戰》3D益智動畫尋日喺央視少兒頻道黃金時間全球首播，咁寶狄媽媽梗係要親身撐場啦！尤其呢輯動畫喺首映前已得到業界好評，仲先後奪得深圳十大卡通金獎同澳門國際電視節金蓮花最佳動漫片大獎。

寶狄媽媽話希望能夠透過動畫、互聯網應用同教育並駕齊驅嘅創意娛教品牌，全面啟發小朋友嘅智慧同愛心，傳播正能量，幫助小朋友學習正面嘅價值觀以及解決問題嘅能力。

獲邀唱主題曲嘅亞洲天后Kelly陳慧琳就話，會為囝囝精挑一啲優質讀物同動畫，將含暴力同不良意識嘅讀物同動畫剔除，以免兩個囝囝受到不良影響，而今次呢套動畫嘅科幻同太空情節甚為吸引，佢話會同囝囝一齊睇，令囝囝學習箇中嘅正面訊息。