城中鏡：李國棟困東京機場打地鋪
呢排日本持續受到大風雪吹襲，唔少開開心心去東京玩嘅港人被玩殘。
李國棟遊日本撞正當地罕見暴雪。（受訪者提供）
東京機場外一片積雪，唔少乘客被迫瞓機場。（受訪者提供）
梁劉柔芬（中）同老公梁孔德（左）遊日焗住貴酒店，當破財擋災。右為兩人的女兒。
早前喺一個新春酒會見到智經研究中心主席Donald李國棟，講起喺日本嘅遭遇，佢話當日原本搭夜機返港，眼見班機不停延遲起飛已覺得唔對路，諗住快手訂酒店過夜，但又擔心大風雪令東京交通大混亂，如果貿貿然離開機場出市區，遇到大塞車塞死喺高速公路仲弊，到時凍死路邊都似，所以最後等到佢班機真係取消之後，佢惟有留喺機場打地鋪，搵幾件衫當被冚。佢話瞓機場都係咁大個人第一次，難得佢仲好睇得開，讚東京廁所乾淨企理喎！
酒店坐地起價萬五蚊一晚
立法會前議員「蘇菲」梁劉柔芬同老公梁孔德都喺東京飽受折騰。蘇菲話返港當日喺東京機場等咗四個鐘都上唔到機，惟有出市區住一晚酒店。豈料市區酒店坐地起價，一間房索價二十萬日圓（約一萬五千港元），佢焗住荷包出血照幫襯。咁咪好激氣好肉赤囉？修佛學嘅佢好淡定咁話，做人睇開啲就無嘢困擾自己。
至於立法會勞工界前議員葉偉明新年期間就留港消費，笑言新春期間出街感覺冇咁多人，佢有親戚住喺上水圍村，新春期間去行一趟，覺得嗰度多咗好多人喎！久未露面嘅資訊科技界前議員譚偉豪就話，唔做議員後幾乎每個月都去旅行，去得最多就係台灣。台灣科技業出晒名，唔通佢想去搵商機？
