香港電台將軍澳新大樓早前拋出「減磅」方案，因建制派立法會議員耍手擰頭而胎死腹中。港台一方死心不息，但商務及經濟發展局局長蘇錦樑尋日趁工會召開記招前「截胡」，講到明多番向議員解釋原方案同「減磅」方案，但結果都係差唔多，所以唔會再上工務小組，現階段會同港台諗掂應付短期需要嘅方案同準備重新招標程序。但係員工又點會就咁算數，一於捉字蝨，實行死（舌累）要新大樓！

設計圖片及對白

港台工會主席蔡玉玲之後反駁，話局方游說工作馬虎。佢哋上禮拜搵咗泛民同部分建制派議員游說，其中泛民二十七名議員聯署支持新大樓方案交畀財委會表決，仲有田北辰同梁家騮兩名建制派支持，加上行會三名立會代表，夾埋起碼有三十二票，票數相當接近。

港台工會捉字蝨反擊

跟住佢又爆出「政治理由」，話局方撤回前一日先搵泛民議員，引述建制派議員覺得政府態度「可有可無」，仲聲稱聽到政界中人話局方一月驚夠票，所以先撤回方案，港台又唔肯應員工要求向公眾詳細解釋造價飆升原因，質疑局方係咪想喺規模上壓制港台落實公共廣播。佢哋仲捉字蝨，話局方只係唔會再上「工務小組」，不如直接上財委會，留下歷史紀錄咁話。工會聽日會趁行會前示威，又會將五百個網上同議員聯署交畀特首喎!

港台就回應話，佢哋游說咗議員二十次，肯見佢哋嘅議員都見晒，但係真係唔夠票。其實睇番今年一月工務小組表決，泛民議員范國威都有份反對，證明唔係所有泛民都支持啦！

第一手消息請下載on.cc東網iPhone/iPad/Android/Windows Phone Apps