政壇：孟國員工識感恩顏寶鈴激讚

顏寶鈴口中嘅第二春即係孟加拉廠房，佢依家每隔一個禮拜就要去孟加拉一次，同當地啲員工關係好好，盛讚佢哋好單純好努力工作，一粒朱古力已當寶咁，同埋仲識得感恩同將心比心，又會送番糖果同木瓜畀佢，令佢好感動，覺得好似返去時光倒流二十五年嘅大陸咁。所以顏寶鈴眼見孟加拉咁窮，主動提議成立一個基金，為員工嘅村莊提供福利，仲有好多其他個別幫助員工嘅例子添！

講開孟加拉，顏寶鈴就停唔到口，佢仲話嚟緊會逐步縮減大陸廠房嘅規模，希望深圳廠房員工由現時約二千二百人減至一千五百人，主力做番高檔產品系列，其他產品就轉移去孟加拉，咁樣會慳好多成本。