政壇：盧偉國靠急才救古董波子
立法會工程界議員WK盧偉國近日經常揸住架古銅色嘅古董車返立會，同其他議員嘅時髦新車泊埋一齊特別搶眼。WK架車係「波子」911 Targa，係佢喺九十年代同一位工業家朋友買入。佢話咁多年嚟架車都係擺喺屋企曬太陽，太太一度嫌佢阻碇要求賣咗佢，好彩佢諗到一條好橋先至成功說服老婆咋！
盧偉國開心愛嘅波子出街，惹人注目。
乜嘢招數呢？佢笑笑口話，佢同老婆講：「你愈老愈可愛，我都唔捨得賣走你，更何況架車？」就係咁簡單，唔止成功氹到老婆，又唔使割愛賣車嘞！估唔到佢都幾有急才。
WK話「波子」係唔少男人心目中嘅Dream Car，當佢發現朋友打算出讓呢架八八年出廠嘅保時捷時，佢二話不說就買咗，仲為佢配上「JK911」嘅車牌。佢大讚架車設計精巧，車身線條近乎完美，性能亦一流，上斜路時引擎都好夠力，落地二十五年嚟甚少維修，堪稱機械工程嘅傑作。最近佢揸開嗰架車突然壞咗，於是就趁機開架古董車出嚟風騷吓。
