政壇：公專聯兩友焗食檸檬
本港債券市場一直處於落後狀態，公共專業聯盟尋日發表金融專家組第二號報告書，批評政府財金官員漠視債券市場發展。雖然政府已多番表明唔打算喺現階段發展本港債券市場，但公專聯兩個立法會議員Kenneth梁繼昌同Charles莫乃光仍然要求當局建立港元債券市場，咁即係焗住自己請自己食檸檬囉！
設計圖片
金融專家組代表韋志堅話，政府雖然自一○年至今一共發行三筆共三百億嘅iBond，但由於年期過短，再加上金額太少，平均每位市民只係買得一手，完全起唔到長遠保值嘅投資作用，完全只係「有姿勢、無實際」。佢哋建議政府採取措施加強推動港元債券市場發展，包括推出更多港元債券增加市場供應、鼓勵各半官方機構喺各項基建工程融資時利用債券集資、增加債券買賣嘅交易渠道，同埋要求證監會加強對個人投資債券同債券基金嘅風險教育等。
未來基建需大筆資金
Kenneth就話未來幾年本港有唔少基建發展需要動用大筆資金，例如機場第三條跑道、迪士尼樂園酒店，甚至喺大嶼山興建人工島等。佢話如果政府肯鼓勵更多公營機構發債，佢哋就可以利用債券進行融資，咁就唔使下下攤大手板問政府攞錢。
不過，政府對鼓勵轄下法定機構發債融資嘅建議回應冷淡，又解釋本港現時財政充裕，暫時無發債需要。Kenneth就批評財經官員對金融市場長遠整體規劃欠缺視野同勇氣，唔係殺到埋身都唔肯做，又話財爺多番警告儲備會有用完嘅一日，如果依家肯開始發展債券市場，到時就唔使手忙腳亂喎！
