領匯無良大迫遷 陰招趕絕小商戶

太一叮要講嘅苦主，就係屯門友愛邨公屋商場一班小商戶嘞。話說領匯○八年接管商場之後，即時展開大規模翻新工程，舊貌換新顏本來係好事，弊在領匯唯利是圖，懶理商戶生計同居民需要，有理無理係咁加租，搞到唔少服務街坊多年嘅老舖被迫遷、轉型甚至執笠。

好似一間留守友愛邨近三十年嘅餐廳咁，領匯限令今個月底前遷出，前路茫茫，倍感徬徨。呢間餐廳當年由友愛邨「冬菇亭」一路做到上商場，領匯接手之後，租金由○八年嘅每月二萬八千元，加到依家五萬幾元，你話點頂吖？

最離譜係，租約仲有半年至到期，領匯已經發信迫遷，要求餐廳接受跨區或跨邨調遷喎。究竟調遷去邊呢？答案竟然係大埔同屯門其他屋邨，同樣面積月租要十二萬元，咁搞法，即係擺明要趕盡殺絕小商戶啫！

唔想跨區調遷都得，餐廳老闆想留守友愛邨，領匯居然叫佢轉行去友愛街市賣燒賣同雞蛋仔，舖位面積只有百幾呎，每月租金就要兩萬幾元，都唔知究竟係搵笨定靠害！

面積大啲都有，不過租金就要加到近八萬元，而且限制多多，話要配合領匯嘅「現代化經營要求」喎。正所謂，羊毛出在羊身上，家陣廿幾元一碗車仔麵，到時最少要賣三、四十元至為到皮，有人幫襯至奇喇！

除咗老牌茶餐廳面臨絕路，亦有文具店難頂加租，焗住大舖轉細舖，棄賣文具專賣報紙，更有街坊酒樓被迫結業。有區議員就批評得啱嘞，領匯大量引入連鎖店，迫遷小商戶，最終脫離基層居民承受能力，只會令居民生活質素下降。

冇錯嘞，領匯以陰招迫遷小商戶，累人累物累街坊，點止友愛邨居民受害吖，其他公屋及居屋商場亦一樣嘅咋。領匯被人批評為富不仁，真係一啲都冇講錯o架。有監察團體指出，領匯多次以翻新商場為名大幅加租，或者要求舊租戶同新租戶一齊投標，變相將舊租戶趕絕，不但令商場變得單一化，亦令市民生活變得好唔方便。

講嚟講去，領匯利用市場壟斷地位趕絕小商戶，引入連鎖集團，推高物價，影響民生，完全係港府當年政策失誤造成嘅惡果。解鈴還須繫鈴人，唔該當局快快諗計，將呢隻怪獸收入籠，如果唔係，搞到民怨爆燈，後果可大可小o架，叮！