潮語「撇sss」嘅讀法，就係「撇」用廣東話再加個英文「sss」嘅尾音，個「s」音要拉幾長就隨你喜歡，「撇sss」嘅意思即係要走，離開一個地方咁解，即係俗語「撇」。唔知幾時開始，相信都有一段時間，有啲人貪玩鍾意喺一啲字後面加「s」音，甚至成句都有「s」，叫做「S-Language」，例如：「你s去邊s度食s飯？」以致後來出現咗好似「撇sss」咁嘅潮語。其實，仲有其他潮語嘅意思同「撇sss」差唔多，例如係「閃」、「掹」同「Yang」。

最近有套由鄒海光執導，吳君如主演嘅港產電影叫做「金雞SSS」，喺農曆新年上映，票房成績不俗。電影內容同前兩集相似，都係講由吳君如飾演嘅老舉阿金，點樣喺今日嘅香港以黃色事業搵食生存。電影情節中，大玩好多香港呢幾年嘅社會現像，其中都涉及到少許政治成分，例如係黑社會「收錢」遊行、議員喺議會嘅行為同大陸人同遊客對香港生活嘅影響等等。有網民大罵導演投共兼抹黑激進民主派同埋示威人士，不過正如戲裏面經常出現嘅網上潮句「認真便輸了」，電影創作自然有佢嘅自由，如果作為一個觀眾，連呢啲玩笑都接受唔到嘅話，咁香港創意工業真係玩完。講開呢套「金雞SSS」，其實好多人連戲名都唔知點讀。其實呢個係英文「s」嘅發音拖長咁讀，「sss」用廣東話標音就係「時」。呢個令人諗起有啲潮語都係咁，就好似「撇sss」!

最近又有經常批評政府嘅電台主持李慧玲懷疑被封咪，被即時解僱，連返公司執嘢，向同事講聲再見都唔畀，呢啲就真係被「撇sss」。香港今時今日嘅言論自由到底剩番幾多？香港係咪唔使等2047就被大陸全面接管？唔怪得之近排又有香港人諗住「撇sss」－即係移民去也!但係，連台灣同加拿大都大幅收緊移民政策，瓦努阿圖又話已被強國人侵佔，香港人仲可以「撇sss」去邊度？應「撇sss」嘅唔「撇sss」，唔應「撇sss」嘅就「被撇sss」……香港人你仲要啞忍到幾時？

第一手消息請下載on.cc東網iPhone/iPad/Android/Windows Phone Apps