曾經做過夜總會舞小姐、二○一○年曾以「大專2012」名義參選過「五區公投」、被稱為「民主小女神」嘅周澄啱啱開年就搵到新工喇，今個星期佢開始「落戶」擔任會計界立法會議員梁繼昌（Kenneth）嘅研究助理。Kenneth係溫和泛民主派，估唔到揀助理鍾意激進派喎。

設計圖片

自從冇做雜誌記者後，周澄已待業一段時間，今次唔算跳槽，但就跳入新界別，尋日佢喺社交網站上載咗自己張職員證相片。Kenneth話，佢本來有個研究助理幫手搞環保同文化政策議題，但係兩個月前離職，所以要搵人替代，搵咗一段時間，最終就由周澄「跑出」，星期一仲開始返工。

周澄以前做記者，周不時去旅行，寫開有關國際關係嘅文章，畢業之後仲去咗菲律賓嘅非政府組織（NGO）打一年工，都算係夠晒國際視野。佢早前仲上載咗多張水着照片，已令一班男網民為之神往，依家轉做議員研究助理，唔知又會否掀起大家討論呢？

第一手消息請下載on.cc東網iPhone/iPad/Android/Windows Phone Apps