政壇：中環銀行街中樂飄揚

永隆銀行今年搞搞新意思，助理總經理兼零售銀行部主管鍾少權（Derek）話，尋日特登為客戶準備咗情人節驚喜，喺總行大堂舉行中樂演奏會，尋日下午舉行咗兩場，每場有四十五分鐘咁長，為銀行大堂生色不少，更創業界先河，由香港青少年國樂團演奏《花好月圓》等十幾首名曲，既有新春氣氛，又畀人甜甜蜜蜜感覺。

銀行公會署理主席李永逵尋日開完例行記者會後，突然主動同大家講情人節快樂，大家問佢去邊度慶祝，佢好醒目咁話：「你咁問，我梗係同老婆慶祝啦！」個樣Sweet到爆，睇嚟李先生為李太安排好晒節目啦。