政壇：女議員餵食湯圓田北辰吃不消
新民黨尋日舉行新春團拜，啱啱同公民力量（公記）「閃婚」，尋日嘅節目就有成員互餵對方食湯圓，扮晒恩愛，其中三個公記女區議員更主動餵自稱係「女人湯圓」嘅副主席田北辰（田二少）食湯圓，田二少開心之餘又驚難消受，急急用日文大叫「Chotto ma te yo（請等一等）」，要求佢哋逐個逐個嚟，果然識歎。至於啱啱成為黨副主席嘅潘國山就向主席葉劉淑儀送上一個同心結，象徵未來會同心合力應對挑戰，葉太十分受落。
女區議員追住餵田北辰（左）食湯圓。
另一邊廂，科大新春團拜亦大玩湯圓，陳繁昌同五位大學高層搞搞新意思，六個大男人着上紅色圍裙炮製愛心湯圓，一眾教授搓粉糰時雞手鴨腳，唔少豆沙餡爆晒出嚟，心形湯圓變成爆漿湯圓，笑料百出。科大近年頻頻被挖角，繼前商學院院長鄭國漢去做嶺南大學校長後，副校長黃玉山四月亦將出任公開大學校長。黃玉山話，最難忘九○年科大創校初期，佢連辦公室都冇，只得一張書枱，依家見證科大成為世界知名學府，覺得好開心。
