馬紹祥試過畀村民拎住石油氣罐威脅。
政府熱廚房接連有人跳船，但亦有新血，做開工程師嘅馬紹祥（Eric）就加入咗發展局做副局長，嚟緊仲主力負責土地改劃，幾乎要走訪十八區區議會做游說工作。一講收地，就令人聯想衝突、糾紛，上任只係一個月多啲嘅Eric卻話冇有怕，咪睇佢外表文質彬彬，原來喺私人工程公司做顧問時，佢曾經處理過天水圍新市鎮收地，試過有村民拎住石油氣罐威脅佢都未驚過。
廿幾年前曾經打過政府工嘅Eric話，洪水橋新發展區早期諮詢時，佢都以顧問身份落村做簡介，當年村民同樣群情洶湧，佢要警察護駕先可以安全出入，未知係咪呢啲經驗，佢一上任就被委以重任，主力負責土地改劃工作。講到重回政府，佢話覺得同發展局理念相近，亦覺得係時候為市民做番啲嘢。不過，發展局高官曾被揭發利益申報不清，佢就好肯定話自己喺新界冇地，只係有個自住物業，海外亦有個單位，身家清清白白，叫大家放心。尋日係難得一遇嘅中西情人節，被問到使唔使買花送畀太太，佢笑笑口話：「花都係要買嘅！」睇嚟鐵漢都有柔情一面。
第一手消息請下載on.cc東網
