政壇：立會電動車叉位無人吼
香港人多車多，空氣污染嚴重，社會上雖然有好多倡議用環保能源汽車嘅聲音，但講同做始終係兩件事。政府總部入伙邁向兩周年，但立法會大樓五個電動車充電車位零使用率嘅情況卻一啲都冇變，去年事件曝光後，至今都係「有位冇人泊」，似乎議員及秘書處方面都對環保電動車唔太踴躍，家吓專責環保議題嘅立法會議員陳克勤打算做帶頭羊，下月起棄自家愛車，同黨友試駕電動車，不過，立法會停車場咁多叉電車位剩，秘書長陳維安真係要諗吓計喇，否則，實畀人話當初做成智能手機叉電位仲可以益到市民。
設計圖片及對白
克勤以身試車三個月
克勤計劃發起為期三個月嘅計劃，去信邀請咗三間車廠借出電動車畀佢試揸，以身試「車」實地考察政府有冇在港實行電動車友善政策，佢嘅黨友、民建聯副主席陳勇都有份參與。依家成功爭取三間車廠借出電動車，克勤打算下月起同陳勇棄自家愛車，各自輪流試揸三架電動車一個月，以第一身感受電動車車主喺香港揸車遇到嘅問題，例如充電設施數目、泊車位置等，三個月後再向政府遞交報告。不過，克勤或者陳勇咁樣借車都有唔少問題，譬如部車如果有事，修車等點計呢？
講番電動車嘅推廣工作，克勤就批評政府鼓勵駕駛電動車嘅政策愈來愈縮，環境局今年只係計劃喺運輸署轄下停車場設立快速充電器，同增設一百個中速充電器，縮短充電時間，但就冇措施鼓勵準車主選購四十萬元起標嘅電動車，咁樣「有位冇人泊」嘅情況恐怕難以解決。
講開環保，政府計劃擴建三個堆填區及興建首座焚化爐嘅「三堆一填」建議將會再闖關，最具爭議嘅要數喺石鼓洲興建焚化爐設施，據知，建議除咗令踩中將軍澳堆填區嘅新界東葛珮帆有投票壓力外，原來選票版圖遠至離島嘅新界西陳恒鑌（Ben）同漁農界何俊賢，都分別擔心支持建議會令離島居民同漁民失望。今次政府箍票真係有暗湧。
