錯開有條路，財政司司長曾俊華又計錯數嘞！
大家可能會話，使乜大驚小怪吖，鬍鬚曾有名你叫「估錯王」，佢冇計錯數至係奇聞喇。冇錯，鬍鬚曾理財無方，年年預算，變成年年失算，計錯數對佢嚟講已經係家常便飯。不過咁，今次有小小唔同，鬍鬚曾唔止口沒遮攔出洋相，而且畀港府公開踢爆講大話，呢次真係想唔認衰都唔得咯。
件事係咁嘅。話說上月施政報告大手筆扶貧，推出多項紓困措施，鬍鬚曾唔知係咪驚自己孤寒財主個齋缽被打破，居然危言聳聽，話港府來年度經常性開支會因而激增約二百億元，繼而引發港府狂加開支，遲早令庫房爆煲嘅質疑。本來呢，財政司司長係港府掌櫃，數據理應最權威最準確，但事實並唔係咁樣，根據港府日前提交立法會嘅文件，施政報告紓困措施全部落實後每年只係增加約七十億元經常性開支，變相否定鬍鬚曾嘅一派胡言。鬍鬚曾畀狠狠摑咗一巴，究竟知唔知醜呢？
醜唔醜都好喇，鬍鬚曾被人叫得守財奴，早就瘀慣嘅嘞。咪話太一叮以君子之心度小人之腹，鬍鬚曾誇大紓困措施嘅財政負擔，主要原因未必係數學差，而係心地差，故意報大數製造恐慌，只要狼來了招數嚇到人咯喎，預算案咪大條道理減少派糖囉。呢，佢日前已經事先張揚，揚言取消一次性紓困措施嘅一日好快來臨，擺明就係為預算案派糖「減甜」鋪路喇。
太一叮真係唔明白鬍鬚曾究竟係乜嘢心態，點解咁鍾意與民為敵。庫房乾塘就話要市民勒緊褲帶啫，家陣庫房滿瀉，你唔開倉惠民，加大紓困力度，反而收緊水喉，派糖減甜，講出嚟都唔合邏輯喇。正所謂取之於民，用之於民，政府坐擁財政儲備七千幾億元，今日唔還富於民，幾時至還富於民？唔通留畀香港電台興建奢華新大樓咩！
嗱嗱嗱，有會計師行發表預算案前瞻報告，估計喺政府賣地收入創新高之下，本年度庫房達到四百億元盈餘，促請港府提供一籃子稅務寬免措施，加碼扶助中產及中小企業。收到未呀，鬍鬚曾！依家社會貧富懸殊，矛盾不斷惡化，莫講基層滿肚怨氣，中產亦唔係好過嘅咋，如果預算案一毛不拔，刻薄寡恩，隨時官逼民反都似！
咁講啦，鬍鬚曾身為港府大掌櫃，年年計錯數已經不可原諒，如果計錯數之餘仲要做守財奴就更加罪無可恕，因住你嘅民望年年赤字，永無扭虧為盈嘅一日吖，叮！
第一手消息請下載on.cc東網
