SUN搞作：打橫嚟講：令世界火熱的「首席智囊」

天氣幾冷都好，世間也有人無懼冰霜，堅持發光發亮，拚出正能量，讓世界溫暖！不過，同時，總會有人看風使，雪上堆霜的！

嗱！一間老機構，做咗幾十年，屹立江湖，見盡險惡，手下高手凡多，無端端，做乜春會開個新「鋪士」，奇形怪狀的叫「首席智囊」？

「首席智囊」一詞，已有語病。若該機構早已聘有多名「智囊」，咁坐最高第一位的，稱為「首席」，也頗合理！但，全公司，只得一件蛋散，又叫「首席」？唔通得一個茶水阿嬸、廁所清潔工和雜役，又叫「首席茶水阿嬸」、「首席所長」和「首席打雜」嗎？

其次，稱職位做「智囊」，也很搞笑啦！「智」係乜春嘢嚟先？「反智」？定係「弱智」？家陣，香港一大堆乜乜「智庫」、「智囊團」組織，全抄襲外國Concept，英文本是「Think-Tank」，原是有關政治、社會或經濟問題的「專家小組」，含有規模的組合，唔係一條友自升神台的！

優秀的中文沒有「智囊」一詞，只有「窩囊」和「陰囊」，若要夾硬跟英文「智囊」相近的，可說是「師爺」，真正高檔次的，稱為「參謀」，不過，「參謀」多用於國家軍制上，坊間向老細獻計的，都係叫「師爺」吧！

「首席」一詞，也是崇洋取用而來的，拿英文「Chief」直譯，所以，首次看到「首席智囊」一名時，直情笑出淚來，成身晒！

一間運作正常，無風無浪的機構，係毋須聘用「師爺」救急的，但「師爺」返工第一日便出岔子，搞到大閘緊閉，門口眾人抗議，呢件「師爺」，便叫「蠶蟲」囉！

寫稿嗰時，收音機話天氣會繼續寒冷，只有捱凍也！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府