香港教育學院爭取正名做大學已經好多年，記得前校長張炳良○八年上任時已開出期票話三年後就可正名，點知三年又三年都未能兌現，一味話「指日可待」，等到佢前年年中提早解約準備加入政府前都未搞掂。舊年九月上任嘅教院新校長張仁良，尋日首次主持傳媒春茗聚會時又開期票，話教院正名已進入直路，但實際上要五年內先至完成，真係得啖笑。
通過評審又要檢討
張仁良舊年接任校長後，曾表示協助教院正名係其中一項重要工作，佢尋日喺春茗聚會時話，嚟緊四月香港學術及職業資歷評審局（評審局）人員將會到教院實地考察，就人文學同社會科學等非教育學科進行評審。佢形容評審有如「照肺」，專家團隊將就行政同教學逐一檢視，對院校嚟講就好似打仗咁，依家正忙於輔導教學人員，希望院校上下全力以赴，做到最好。
當過完評審局嗰關，預計最快年底，又到教育資助委員會展開院校檢討程序。講到呢度，終於到戲肉，張仁良話如果全數通過嘅話，相信政府再冇任何理由唔畀教院正名，教育局同行政會議就冇藉口唔拍板咁話，咁就寄望五年內可以成事。
大家冇聽錯，係五年，五年後即係二○一九年，如果有幸通過政改方案，下屆特首已由普選產生，但教院仲喺度講緊正名大學，真係難怪啲教院學生會咁憤怒。
第一手消息請下載on.cc東網
