沈祖堯話做學生嗰時未諗過侮辱老師。（資料圖片）
尊師重道一向被視為理所當然，但中文大學校長沈祖堯尋日就喺網誌好無奈咁話，近日收到一位英語導師嘅投訴，原來導師之前收到一份由學生喺課程結束前填寫嘅教學評估表，點知個學生竟然寫英文粗言穢語，令呢位導師深受侮辱。沈祖堯話唔知事情嘅始末，亦唔知道呢位導師教成點，但好理解導師對年輕一輩呢種行為感到痛心同失望。
慨嘆師生關係退化
沈祖堯坦言自己都做過學生，亦曾領教過差勁嘅老師，佢哋備課不足無聊透頂，或嚴厲刻薄，甚至粗魯無禮，但講到出言侮辱老師，佢連諗都唔敢諗。佢仲話唔知嗰個學生嘅身份，亦無意追究，但佢直言，唔明點解一個讀書人可以出言傷人。
佢又慨嘆現今嘅教育體制下，師生關係退化到呢個地步，令佢好痛心，佢都親身遇過有學生上堂遲到，仲手持飲品大搖大擺進場，亦試過有學生喺堂上講電話，迫使佢停止講課。佢希望可以重建師生關係同互信，亦讓學生向老師表示應有嘅尊重。佢語重心長咁話希望寫粗口嘅學生睇完呢段文字，就親自向嗰位導師道歉喎!
第一手消息請下載on.cc東網
