中聯辦早前邀請全體泛民主派立法會議員赴宴，諗住就政改好好溝通，但泛民始終擔心「行入中聯辦」後再次腹背受敵，最終只係選擇出席中聯辦喺灣仔會展舉行嘅新春酒會。中央未能透過中聯辦破冰，惟有轉為透過港區全國人大、政協，出動多位具分量嘅社團領袖相約溫和泛民人士食飯會面，希望就政改問題向佢哋收風兼摸底。
據聞，最近泛民多位溫和派人士如白鴿黨張文光、民協馮檢基，甚至會計界梁繼昌等，都分別被唔同派系嘅左派社團領袖邀約飯局。呢班社團領袖向溫和泛民力陳利弊，例如指今次政改未能通過，原地踏步嘅話，泛民嘅影響力只會有減無增，屆時一千二百名選委掌握大權，泛民未能變成「關鍵少數」，所以游說泛民多同中方溝通，打開對話大門。
不過，部分泛民亦喺席間表明心迹，好似白鴿黨就話上次政改支持咗政府方案之後已預期會飽受攻擊，但從未想過連議席都大幅萎縮，所以今次「好難啃得落」，否則隨時有亡黨危機喎。真係啃唔落？定係時間嘅問題呢？
第一手消息請下載on.cc東網
