馬逢國自稱由年初二病到依家都未好番，未必參加到後日馬拉松賽事。
後日就舉行渣馬，雖然立法會議員梁耀忠今年因傷缺陣，但仲有最少兩位議員報名參加賽事。體育、演藝、文化及出版界嘅馬逢國透露報名參加十公里賽事，但由於呢幾日患上感冒，唔係好出到聲，後日未必可如願去跑步喇。咦！把聲同跑步有乜關係呢？
馬逢國話由年初二病到依家都未好番，如果情況持續，今年就可能要同馬拉松講拜拜。佢話舊年同今年都係報名參加十公里賽事，又話原本想進一步挑戰自己報半馬賽事，但後來諗諗吓都係決定維持原判。
另一位參賽者就係成日行山嘅資訊科技界議員莫乃光，佢話舊年用咗兩小時三十九分鐘完成半馬賽事，預計今年成績會差過舊年，目標係喺三個小時內跑畢全程。佢話年初一同年初三都有練習跑步，但就唔小心拉親條筋，希望可以好快好番去參加比賽喎!
第一手消息請下載on.cc東網
