政壇：面懵心精譚志源識撈
政制及內地事務局局長譚志源農曆年前去過維園年宵市場向市民派發政改揮春，但慘被示威者狙擊，社民連成員黃浩銘更成功突襲，向佢送上寫有「公民提名」嘅揮春。當時有政制局官員話會將揮春內容當為市民喺諮詢期內表達嘅意見，開頭大家以為講吓就算，點知黃浩銘早兩日喺社交網站上載一封由政制局發出嘅公函，信中話當局已收到佢送出嘅揮春，仲話日後會將揮春上嘅意見刊載添！
設計圖片及對白
擅走位避過攻擊
政制局喺信中首先話收到黃浩銘喺一月二十六號送畀局長嘅揮春，感謝佢就政制發展提供意見，之後就問佢會唔會反對當局日後喺政府文件中刊載佢張揮春。譚志源做到咁，黃浩銘都冇乜嘢可以挑剔，只係回覆話唔會反對，又話「公民提名」揮春刊載喺官方文件中可以畀市民參考，又大讚譚志源係一個相當有趣嘅人。社民連成員都會讚官員，真係聞所未聞。
其實，譚志源唔止係一個有趣嘅人，仲係一個面懵心精嘅官員。點解？話說佢尋日出席北區區議會會議時，席間回應人民力量建議對內地旅客徵放入境稅嘅建議，佢就舊事重提，話喺○二年擔任財爺「阿松」梁錦松新聞秘書時，都有考慮過設立入境稅或陸路離境稅嘅可行性，但當時大部分市民同政黨都反對，認為對香港居民往返內地帶嚟沉重負擔，亦不利兩地經濟融合同社會交流，所以即使依家再度提出同樣建議，相信都係不太可行。
相信大家仲記得，阿松當年被揭喺公布預算案前偷步買車，黯然辭職下台，當時有輿論批評譚志源並冇提醒阿松買車行為或會涉及利益衝突。不過，正因為佢識得審時度勢，唔怕搽面懵膏，所以先可避過外界攻擊，官至呢個位囉！
