管理混亂兼老化 港鐵事故永無休

呢，尋日港鐵又出事喇，而且係打孖嚟添。清晨六時三十分左右，一班東涌線列車駛至香港站時懷疑車門出現故障，需要緊急回廠維修，約千名乘客焗住離開車廂，轉乘下一班列車，認真濕滯；相隔唔夠兩個半小時，觀塘線一班往油麻地嘅列車駛達石硤尾站後，車門開關亦出現故障，嘗試關門十次不果，職員被迫疏散車上逾二千名乘客，全線列車服務大受影響，其中石硤尾及九龍塘站淪為重災區，車站擠滿大批上班族及學生，舉步維艱，怨聲載道。

港鐵事故不斷，路路不通，早就唔係新聞，反而如果港鐵有一日唔出事，先至係重大新聞。話口未完，又有網民投訴，日前一列觀塘線列車由油麻地駛達旺角站時，列車停站位置超過正常位置，其後雖然補番鑊，但餘下車程被迫慢速行駛，令行程延誤。咁搞法，難怪有乘客對港鐵失晒信心：「依家每日返工都要預留時間畀港鐵延誤！」

港鐵事故年中無休，鑊鑊新鮮鑊鑊甘，唔通呢啲就係港鐵管理層嘅服務承諾？如果係嘅話，你哋百分百達標嘞，港鐵嘅事故率高到冇人信，東鐵、西鐵、地鐵、輕鐵輪流跪低，你估玩俄羅斯輪盤，乘客每日搭車都要賭運氣咩！

事實證明，有因必有果，港鐵事故絕非偶然，一次出事就話係意外啫，日日出事肯定事出有因喇。即係咁，港鐵嘅事故紀錄仲長過路軌，管理不善固然係主要原因，而另一個原因可能係系統老化、機件殘舊，如果唔係，點會搞成咁吖。好心港鐵快啲全面檢視整個系統喇，否則，遲早車毀人亡都似。

當然啦，港鐵系統係咪老化要檢查過至知，但港鐵管理層頑固不化就係肯定嘅，如果唔係，又點會睇住港鐵事故不斷依然無動於衷呀。都係立法會議員講得啱，港府若然想港鐵管理層痛定思痛，洗心革面，淨係向港鐵徵收罰款係冇用嘅，應該同時向管理層作懲罰性處分，每次列車延誤十分鐘，集體扣人工一萬蚊，只有令佢哋感到切膚之痛，先至會積極改善管理，提升服務。計太一叮話齋，呢個辦法的確唔錯o架，港府不妨諗諗。