城中鏡：項明生遭電郵騙徒擺上枱
旅遊作家James項明生成日出門外遊，保護自己免受傷害相信唔使人教，但無辜墮入電郵騙局仲連累前老闆為自己奔走就唔好彩喇！正身處緬甸旅行嘅James日前無端端收到多位朋友問候，問佢係咪喺塞浦路斯遇劫，連James嘅前日籍老闆、PlayStation亞太區前社長安田都「中伏」，退咗休兼住郊區都特地幫James去塞浦路斯駐東京辦事處報案。即使係電郵騙局，但前老闆為自己奔走，James真係感動到喊。
項明生（戴帽者）探訪緬甸漁村一間小學，同學生合照。（互聯網圖片）
雖然麻煩咗前老闆，但好彩James發現得早，拿拿聲上社交網站報平安令朋友們安心。James仲話平時出門一定提高警覺，例如盡量揀着當地人嘅衫，「喬裝」成當地人以減低財物損失嘅風險。其實正當大家以為James身陷險境嗰陣，原來佢正探訪緬甸漁村一間小學，仲自攜好多衫褲鞋襪、文具餅乾送畀小朋友。去旅行都記掛當地小朋友，認真有心。
