城中鏡：百變樓神騎師Look夠架勢
尋日又係長實一眾高層粉墨登場、一年一度「大龍鳳」嘅日子，一向有「百變樓神」之稱嘅集團執行董事趙國雄繼續鬼馬，今年用咗騎師Look亮相，成班營業部要員，英姿颯颯示人，配合大會人強馬壯、威震四方嘅主題，氣勢逼人。
趙國雄為配合馬年，以一身騎師造型會見傳媒。
趙樓神解釋，今年適逢馬年，為咗應節特別構思出以騎師造型會見傳媒，原因是騎師代表着駕馭同掌握控制一切，寓意集團可以掌控整個局面，掌握銷情及買家需要，希望馬年一馬當先，馬到功成。
睇佢哋一身造型，應該所費不菲。趙樓神自爆一身由頭至腳裝備，原來係循環再用，呢套裝備係當年香港協辦奧運馬術比賽時，集團為宣傳樓盤而度身訂造嘅，當時全套成本要四千多元。在旁公關大員都好識做，話趙生今時今日仲可以着番當年尺碼嘅衫，足以證明佢身形keep得好好。
