踏入馬年，名人Stephen明肇豐同太太Caroll帶埋仔仔Justin子俊、與囡囡Elizabeth雅詩到騎術學校騎馬應節，廿四孝爸爸Stephen不惜落場做馬伕為囡囡拉「頭馬」，一對精靈小寶貝喺沙圈行大運好神威。

明肇豐不惜落場做馬伕，為囡囡拉「頭馬」。

恭祝你
明肇豐舉家恭賀讀者：「合家平安，總要夠運，而小朋友就聰明伶俐。」

闔家歡
一家四口到騎術學校騎馬應節，明肇豐一對精靈小寶貝仲喺沙圈行大運。

Stephen話每逢新年都會返回加拿大滑雪，今年就打破慣例留港度歲，仲喺年初一號召明家所有成員到媽媽家拜年，佢話：「小朋友就讀國際學校，中國農曆新年只放得一星期，返加拿大滑雪，機程都要兩日，邊夠時間？惟有改到大陸浸溫泉！」佢又話最開心同小朋友一齊布置屋企，而年三十晚食完團年飯返屋企就齊齊封利是。問到馬年願望？佢同太太Caroll都希望一對活寶貝學業進步，活得快樂又身體健康。Stephen話：「最緊要生生性性，做父母都係將全副心思放在小朋友上。」喺旁邊嘅太太Caroll就話：「老公愈搵愈多，全落我袋！」

囝囝愛運動 自信可代表香港

囝囝Justin坦言自己有運動細胞，希望新一年喺運動上有發展空間，佢話：「我鍾意滑雪，籃球同足球，希望愈練愈好，可以做個出色運動員，代表香港出賽。」妹妹Elizabeth笑言自己係創意分子，希望專注藝術創作。

話口未完，Justin則取笑妹妹話：「佢最叻係食同瞓！」Elizabeth聽罷則作狀打哥哥，場面溫馨卻搞笑！玩完一大輪，明肇豐舉家仲恭賀讀者：「合家平安，總要夠運，而小朋友就聰明伶俐。」

第一手消息請下載on.cc東網iPhone/iPad/Android/Windows Phone Apps