SUN搞作：打橫嚟講︰小小運動員，你咪「未贏先驕」啦！

香港短道速滑運動員呂品韜，亦係今屆俄羅斯索契冬季奧運會嘅香港唯一代表選手，因腳患負傷出征，早就不被睇好有獎攞，即使多番要求有隊醫隨團照顧亦無效，所得回覆，只係港奧委會以「港隊名單已滿」一句。無就無啦！反正前幾屆冬奧都無隊醫隨行，有贊助咪得囉！

呂小朋友少不更事，賽後向傳媒訴苦，話有啲「團友」到達索契後便不見蹤影，從無關心或慰問吓佢準備成點？只係有電視台採訪時才蒲吓頭。

賽敗後，啲人更連飯都唔食，兼無收到任何一個香港官員的慰問，梗係啦！都無彩攞，出嚟做乜？

但！不過！代表團團長王敏超卻有話說喎！佢認為選手村裏有醫院、診所矣！哦！畀佢帶車隊去澳門東望洋大賽就好了！對面街有車胎同螺絲配件買啦！隔籬7仔仲有藥水膠布添！帶咁多廢物去，嘥運費咩？廢柴例外！

那個港協暨奧委會義務秘書長彭沖的回應更堅：「照顧一個運動員，我哋唔係要好似（照顧）baby咁……唔通要個個都日日去問安請安？」咪係！o靚仔！你大個仔o架啦！應要好好自己照顧自己先得o架！咪以為你係今次唯一香港代表，就「未贏先驕」至得o架！

王敏超返港向傳媒說：「我都做過運動員o架！有啲運動員達唔到成績，就搵其他理由出嚟，將自己輸咗嘅原因攤分吓，其實，都係好普通嘅現象！」噢！乜你做運動員咁諗o架？

在此呼籲，香港啲金牌選手哥哥姐姐，唔該出嚟講兩句人話，教吓呢個小朋友做人啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府