小王每日求神拜佛，只求早點脫離打工仔行列，做個有錢人。是夜月明星稀，心誠則靈，終於感動神明現身。「小王，如果你答啱呢條問題，我就變你做個有錢人！你知唔知港島、九龍、新界，邊區嘅人最捨得消費？」家住新界嘅小王，從小就以住上半山為人生目標，即時回答：「梗係港島啦，港島最多豪宅，啲人當然最捨得消費。」信心爆棚的小王正待神明祝福變做有錢人，豈料神明訕笑道：「係新界至真！你話港島啲人最捨得消費，你有冇見佢哋好似上水、元朗啲水貨客咁，日日拎袋錢去掃貨？」

小王雖然有中伏嘅感覺，但為咗唔想得罪神明，只好堆起笑容讚道：「講得啱，不過咁難得先遇到神明，可唔可以畀次機會？」神明亦非無情，呵呵兩聲又再提問：「二揀一嘅問題，天橋底同私樓，住邊度嘅人有錢啲？」小王開心到跳起，即時搶答：「梗係私樓啦，唔通橋底乞兒有錢啲？」神明聞得答案，當下搖頭嘆息道：「做業主，個個欠銀行幾百萬，你幾時聽過乞兒欠人錢？」神明走了，但在那偏遠的天橋底，從此便多了一個乞兒叫小王，還會時常喃喃自語：「我係有錢人……」

第一手消息請下載on.cc東網iPhone/iPad/Android/Windows Phone Apps