設計圖片及對白
立法會尋日起一連三日辯論施政報告致謝動議，身兼新界鄉議局主席嘅立會議員劉皇發喺動議發言嘅時候，罕有地辭鋒銳利咁批評政府「居安未能思危」，警告政府咪「沾沾自喜」、「心存僥倖」，仲連過往甚少喺佢口中提及嘅奶粉荒、個人遊逼爆香港等議題，都罕有「發炮」。鄉議局組黨最近鬧得沸沸揚揚，莫非發叔想乘機為自己壯壯聲勢？不過，有消息人士就踢爆，鄉議局組黨好大機會都係有頭威冇尾陣。
鄉議局忽然組黨，仲話要派人參加選舉，加上發叔尋日喺立會批評政府嘅發言，確係表現得係威係勢。不過，有消息人士透露，其實鄉議局組黨係為新界原居民消消氣，實情十畫都未有一撇，甚至可能係吹水居多，分分鐘到最後冇咗件事都未定。
其實，發叔尋日發言鬧完一大輪後，話如果想解決內地旅客逼爆香港嘅問題，就要做好鐵路運輸。兜咁大個圈，原來係叫政府快啲興建荃屯鐵路囉！
第一手消息請下載on.cc東網
