都同大家講過，新民黨同公民力量（公記）尋日完成「閃婚」，兩大政團正式宣布結盟，除咗沙田區議員龐愛蘭同立法會議員林大輝外，所有公記成員都加入新民黨。突然之間多十九位區議員入黨，黨主席葉劉淑儀即時發表大計，話希望該黨日後區區都有議席，但係咪鋪路選特首，佢就話係言之尚早喎！

葉劉淑儀（前左四）同公民力量會長何厚祥（前左三）及新任黨副主席潘國山（前左五）等人手握手壯聲勢。

新民黨本身已有十二名區議員，兩政團結盟後，總共增加到三十一名區議員，絕對有資格問鼎超級區議會議席，兼任荃灣區議員嘅田北辰就話係咪選超級要問過自己區嘅選民先。既然係結盟大日子，公記都好畀面，派咗十幾人撐場，新民黨正副主席當然有到啦，但另一位黨副主席鄭承隆就全程冇影。

今次兩黨「閃婚」好順利，但開記者會時就有少少蝦碌，公記兩位區議員羅光強同鄧永昌嘅名牌突然「升呢」，變咗做沙田區議會副主席，睇嚟新民黨仲未搞得清楚公記啲新成員背景喎！

第一手消息請下載on.cc東網iPhone/iPad/Android/Windows Phone Apps