政壇：徐立之搵工列四大條件
將喺三月底離任嘅香港大學校長徐立之，尋日最後一次以校長身份出席新春傳媒團拜，佢坦言對政治冇興趣，相信從政機會相當微，仲列出搵工四大條件，分別係唔使負咁大責任、酬勞有番咁上下、提供住屋津貼同埋要做得開心。
徐立之尋日最後一次率領港大領導層同大家拜年。
搬離港大前先「執垃圾」
徐校長笑笑口話唔係唔想負責任，只係唔想再咁辛苦啫，至於人工當然愈高愈好啦，住屋對佢嚟講就更加重要，事關佢一直以來都住喺港大校長宿舍，無喺香港置業，若然份工冇提供住屋津貼，佢就要用一大筆錢租屋，咁就相當唔划算喇。至於做得開心就好簡單啦，就係一定要對份工有興趣。
佢仲透露，已有唔少機構向佢招手，但所有事都要等四月一日先慢慢傾，現階段要先「執垃圾」。原來佢○二年由加拿大返港出任港大校長時，連三十幾年前有關基因圖譜嘅研究結果都帶埋嚟，之後一直存放喺士多房，近期數數吓發現原來有成三十幾箱雜物，當中包括佢第一本日記、小學「見紅」成績表、紀念冊等等，搬離港大前定要先處理好呢啲手尾。
臨別在即，佢話唔覺得八一八事件係個遺憾，因為大學有好多唔同嘅聲音，最重要係維護學術自由，呢樣亦係佢一直以來堅守嘅原則。
做咗港大校長咁多年，佢最唔捨得嘅係同事、校友同各界朋友，至於自己做得好唔好，就由大家評分喎!
