政壇：郵輪風「芸」騰騰震

阿Ann尋日喺新春團拜中講到今次郵輪事件嘅來龍去脈，原來佢一心諗住今個農曆新年假期去越南玩，所以已訂咗兩張機票，諗住同老公飛去越南，可惜喺準備上機嗰日，立會開會耐咗，搞到趕唔切班機，白白冇咗萬幾蚊，而機緣巧合下就上咗呢艘郵輪玩。所以話呢，一切冥冥之中自有主宰。

喺事發當日，當啲團友得知郵輪未能泊岸已唔太高興，因為佢哋上網查過資料，發現越南當地嗰單沉船意外，當局只係關閉碼頭約十五分鐘，而航道亦照樣開通，所以咪質疑船公司囉。

直至艘船到咗香港，佢都有諗過落船o架，但又諗到啲團友需要幫助，所以就決定留喺船上面喇。佢又話如果旅行社肯早啲派高層上船，呢件事就唔使拖咁耐，而佢事後先至發現香港冇規管郵輪嘅政策，包括意外發生後嘅賠償機制，同監管入境後郵輪排污等，所以政府一定要盡快解決呢啲問題喎！

譚耀宗監場 免講多錯多

咁一向惹火嘅阿Ann對於被批評為「旅霸」又點睇呢？佢話希望唔會因而喺市民心目中失分，重申當日係因為要留低安撫乘客，先至唔離開郵輪。

講得夠白啦！當日喺郵輪上勇字當頭為旅客爭取賠償，依家佢似乎就震騰騰，擔心會失民心嘞！再講，尋日當佢講緊郵輪事件時，佢嘅黨主席「譚Sir」譚耀宗就全程在場，被記者問到如果遇到呢啲事件應該點解決時，佢就細心解釋，話要同團友建立信任，再去分析。

唔知譚Sir係咪諗住做監場，睇實阿Ann咪再講多錯多呢？