禽流防不勝防 分流一了百了

谷到爆嘅唔止雞農，仲有本地雞場。據業界估計，到禁雞令屆滿時，全港雞場囤積嘅「超齡雞」會有五十萬隻，市場一下子難以消化，希望當局盡快搵地方分流內地及本地雞。不過，食物及衞生局局長高永文就話，搵咗幾個供港活雞暫存區選址，不過就各有問題喎。

嗱嗱嗱，你班官可以等，幾十萬隻雞點等？咪話太一叮唔提醒，千祈咪學人稱「周一鑊」嘅上任局長周一嶽咁，話搞分流，拖拖拉拉冇下文，推行中央屠宰煞有介事，點知最終放棄計劃。有立法會議員就批評得啱嘞，周一鑊多年來歎慢板，係漠視活雞供應流程嘅漏洞，防疫不力。

叮！周一鑊簡直係殺雞嘅罪魁禍首。業界早喺十年前已要求當局設立兩個家禽批發市場，然後分送港九新界各街市零售，佢在任多年乜都冇做過，搞到家陣一旦內地雞中招，就一刀切殺雞停售，令雞農血本無歸。

「東方報業民意調查」結果顯示，對於本港只得一個活雞檢疫區及批發市場，無法分割中港活雞，三成四受訪市民促請政府應該撥亂反正，糾正問題；三成一人直指當局決策錯誤；兩成八批評活雞供應流程存在漏洞。

對於每次有供港內地活雞感染禽流感，都會連累本地活雞一刀切被銷毀及停售，近五成受訪市民認為當局冇吸取教訓完善機制；兩成五人指業界無辜受害，損失慘重；認為本地雞成為犧牲品嘅亦有兩成二。

調查又顯示，周一鑊拒絕採納業界設立兩個批發市場嘅建議，畀受訪市民閙爆。有三成五人指佢目光短淺，怕多做多錯；認為周一鑊防疫被動，優柔寡斷，以及直斥佢係殺雞罪魁禍首嘅，同樣都有近三成。對於佢話要取締活雞行業及設立中央屠宰，最後又放棄計劃，有兩成六市民認為係欠承擔，遺留爛攤子；三成半人認同應該重新研究設立中央屠宰，亦有近三成半指前朝官僚，未能當機立斷。

一禽染病，殺雞無數，根本於事無補，更隨時引起雞農及雞販不滿，政府當務之急係速速搞掂活雞分流。仲有，目前內地活雞僅佔整體供應量約三成，只要稍為放寬本港雞場養雞限額，完全可以做到自給自足。都係嗰句，辦法總比困難多，就睇港產官僚肯唔肯畀心機做嘢啫，叮！