農曆新年就快完，一輪慶祝嘅活動已經玩得七七八八，不過大家唔使驚，身為傳媒人嘅李衞捐窿捐罅，準備為大家介紹新奇好去處。

李衞：嚟緊個禮拜六，老廉搞開放日！

市民：唓，開放日，仲要係老廉，悶死啦！

李衞：有好多舊時嘅嘢睇，連「咸豐年」巨貪案證物都有，葛柏「收片」數簿，夠吸引啦啩？

市民：都冇乜特別喎……

李衞：呢個猛料喇，貪湯收禮罪證之一，價值二十萬嘅屏風都有得睇！

市民：咦，貪湯啲衰嘢？

李衞：係呀，不知廉恥嘅貪湯，濫用公帑豪買禮物、又瘋狂外訪……

市民：正喎，有無恥之徒嘅嘢睇！係呢，仲有冇多幾樣佢嘅衰嘢睇？咁先有賣點o架嘛！

李衞：咁呀，一於叫老廉綁起貪湯貪曾兩兄弟放埋出嚟展覽啦！

第一手消息請下載on.cc東網iPhone/iPad/Android/Windows Phone Apps