尋日行經灣仔嘅富豪飯堂，咁啱見到中港照明器材集團主席孫大倫夫婦到埗，佢哋落車後即刻向飯堂嘅員工派利是，之後仲好大方咁企定定畀記者影相。

孫大倫夫婦（左一及左三）同大仔一家齊齊食晏。

初時以為淨係孫大倫夫婦撐枱腳，點知佢哋食完晏之後，仲見到佢大仔孫道弘夫婦同兩個囡囡一齊離開，原來佢哋一家食飯敍天倫。問到細仔孫道熙夫婦點解唔一齊嚟食飯呀？孫太回應話：「（佢哋）去咗度蜜月，三月頭先返，去咗歐洲睇北極光。」咁契女活希兒有冇向佢哋拜年？孫生好爽快咁答：「有呀。」

再追問佢哋身邊嘅大仔孫道弘夫婦近期係咪出國外遊？孫道弘太太即刻話：「啱啱喺澳洲返嚟，今日着得紅噹噹同老爺、奶奶拜年。」

第一手消息請下載on.cc東網iPhone/iPad/Android/Windows Phone Apps