喺早幾日，香港發生嘅郵輪風波，成為城中熱話。前日唔少城中名人趁周末到沙田馬場輕鬆吓，保良局主席Eric鄭錦鐘、香港工業總會青委副主席Gary劉燊濤等人講起搭郵輪貼士，個個都有一本獨家秘笈。打算退休後同太太搭郵輪歎世界嘅Gary爸爸工總主席Stanley劉展灝就話，今次事件學到唔少嘢，可供日後參考喎！

劉展灝夫婦（左一及二）喺郵輪風波中學到嘢，右一及二為細仔劉燊霆及女友。

劉燊濤夫婦分享搭郵輪「三部曲」獨家秘笈。

鄭錦鐘（右）畀貼士，強調船員同旅客保持適當比例好緊要。

Eric搭郵輪未遇過不愉快事件，佢嘅心得係要睇船員同乘客嘅比例。佢話試過搭只有二百名乘客嘅郵輪，旅客與船員嘅比例係一比一，亦曾經坐過六千幾人嘅大郵輪，平均一名船員服侍三名旅客，兩者比例都適當，旅程亦好愉快。

劉展灝引以為鑑

Gary同太太Daphne吳奕筠舊年八月亦曾搭郵輪暢遊北歐，咁啱就係參加今次出事嘅美麗華旅遊。有多次搭郵輪經驗嘅Daphne分享「三部曲」獨家貼士，首先係揀一間有口碑嘅郵輪公司，然後選擇啱心水行程，最後先至決定跟邊間旅行社。同場嘅Stanley就話平時忙到飛起，邊有時間坐郵輪歎世界，所以打算退休後先至享受人生，今次事件令佢上咗寶貴一課，原來搭郵輪要小心揀選，唔可以馬虎。

第一手消息請下載on.cc東網iPhone/iPad/Android/Windows Phone Apps