政壇：搞搞政︰阿王傳轉戰超級議席
各個黨派已部署一六年立法會選舉，當中尤以工聯會最為着緊，皆因佢哋嘅榮譽會長陳婉嫻到時已七十歲，分分鐘退休唔玩，要搵定人接班。近來有消息話「阿王」王國興可能走出港島，接嫻姐棒轉戰超級議席，先幫工聯會保住一席。
設計圖片及對白
做咗東區區議員多年嘅阿王喺○四年自動當選為立會勞工界議員，○八年改去新界西直選兼勝出；一二年，工聯會改派新人麥美娟出選新界西，阿王就重投港島區懷抱，最後以四千票之差擊敗公文袋陳淑莊，以港島尾席連任。
郭偉強勢出選港島區
工聯會有個不成文規定，勞工界議員只可做一屆，之後就要落地區接受選舉洗禮，所以該黨嘅鄧家彪同郭偉強就要盡快諗定後路。郭偉強跟阿王從事地區工作多年，阿王喺○七年區會選舉更放棄東區區議員議席，改為推薦郭偉強參選，如今郭偉強不斷喺港島區經營，如果最後工聯會決定搵佢出選港島，阿王就惟有再度轉區，甚至疊埋心水選超級議席。
前路茫茫，阿王尋日喺新春團拜時仍氣定神閒話會做好現屆工作，遲下先諗下屆去向。被問到點睇郭偉強出選港島，佢話想工聯會愈來愈多新人出選地區，咁樣對成個黨嘅發展都係件好事。不過，如果阿王選超級議席，佢首先要搵個位選番個區議員，咁先合乎選超級議席嘅條件。
