政壇：沈祖堯遊合一亭有感觸
中文大學校長沈祖堯日前發表網誌，講到早前去新亞書院「天人合一亭」一遊時，藝術建築師陳惠基對佢講解該亭嘅設計理念同來龍去脈。沈校長又喺網誌度提及中大教學同研究、培育人才、貢獻社會嘅目標，並提到近四載校長工作感想。
中大校長沈祖堯。
寬闊嘅石級連接到平台之上。
「天人合一亭」係中大唔少師生同訪客都鍾意到訪嘅地方，係紀念錢穆教授嘅一座建築物。沈祖堯日前就同該亭嘅藝術建築師陳惠基，一齊到訪該亭喇。陳惠基仲即場分享該亭嘅設計概念，原來圓形、水池、甚至係榕樹嘅位置，都融合咗「天人合一」嘅特質，象徵天圓地方、上善若水，意指「人生」與「天命」兩者和合為一，難怪成為中大一個有靈氣和洗滌人心嘅地標。
適逢中大剛剛走過五十載，沈祖堯回憶起自己亦係喺五十歲上任校長一職，所謂「五十知天命」，佢亦不忘藉住呢個機會反思中大嘅「天命」同理想，佢話中大要為中華民族培育有心有能力嘅領袖，同埋要向西方傳揚中華文化，即使面對重重困難，仍然會走下去。
