政壇：佔中下月再搞電子投票
「佔領中環」今年元旦透過港大民意研究計劃搞咗個電子投票，當日有六萬人投票，但電子系統曾出現網絡「大塞車」，有政府高官直頭話當日投票結果冇乜參考價值，但呢個都無阻佢哋「再接再厲」，事關佔中下月會再搞多次電子投票，但合資格選民只有約二千人，呢次睇怕系統應該承受到，至於係咪有參考價值，呢個就留待大家自行判斷喇！
佔中商討日由舊年十月至今搞咗近四個月，依家差唔多完成，據知佢哋準備下月一日喺中文大學舉行總結會，曾經參與商討日、簽咗意向書嘅約二千人，會前可以透過港大電子投票系統，就包括特首選舉係咪依照國際標準、提委會點樣組成等十幾條問題作優次排序，會上公布結果。
料有二千人參加
另一方面，嗰日亦會商討佔中點樣決策、係咪用「五區公投」爭取公眾認受方案等技術性議題，預計會有五百人出席。
如果照計只有二千人投票，系統理應承受到，至於係咪會顧此失彼，影響到本身嘅參考價值，就只有佔中自己先至知喇！
